ಸ್ನೇಹಸೌಧ

ಅಪರಿಚಿತ ನಾನು
ಅಪರಿಚಿತೆ ನೀನು
ತೆಗೆದೆ ನೀ ಪಾಯ 
ಕಟ್ಟಲು ಸ್ನೇಹ ಕೋಟೆಯ 

ಮೌನ ರಾಜ ನಾ
ಮಾತಿನ ರಾಣಿ ನೀ
ಕಟ್ಟಿ ಮುಗಿಸಿದೆವು 
ಕೂಡಿ, ಸ್ನೇಹ ಕೋಟೆಯ

ಚಂಡಮಾರುತವೆ ಬರಲಿ
ಭೂಕಂಪನವೆ ಆಗಲಿ
ಸುಭದ್ರ ನಾವಿಬ್ಬರೂ
ಈ ಸ್ನೇಹವೆಂಬ ಕೋಟೆಯಲಿ

ಅಪೇಕ್ಷೆ

ವ್ಯಥೆ  ನೀಡಿ ನೀ ನನಗೆ 
ಪ್ರೀತಿ ಕಥೆಯ ಮಧ್ಯಕ್ಕೆ
ಪೂರ್ಣ ಬಿಂದುವನಿಟ್ಟು 
ಮಾಯವಾದೆಯಾ ಗೆಳತಿ

ಸ್ವಲ್ಪವೂ ನೀ ಮಾಡದೆ 
ಆಲೋಚನೆ, ನನ್ನ ಪ್ರೀತಿ
ಹಣತೆಯ ನಂದಿಸಿ ಎಲ್ಲಿ
ಕಣ್ಮರೆಯಾದೆಯೇ ಗೆಳತಿ

ನೀ ಏನೋ ಜಾರಿದೆ 
ಚಿರನಿದ್ರೆಗೆ, ಮುಳುಗಿಸಿ
ನನ್ನ ಕಣ್ಣೀರ ಕಡಲಲ್ಲಿ
ಒಂಟಿ ಮಾಡಿರುಹೆ ಗೆಳತಿ

ಹೃದಯದ ಪ್ರತಿ ಮಿಡಿತ
ನುಡಿಯುತಿಹುದು, ಗೆಳತಿ
ಎಂದಾದರೊಮ್ಮೆ ನೀನು
ತಿರುಗಿ ಬಂದೆ ಬರುತಿ  

ನಿವೇದನೆ

ಒಲವೇ ನಿನ್ನ ಚೆಲುವ ಚೆಲ್ಲಿ
ತುಂಬಿಸಿದೆ ನನ್ನ  ಹೃದಯ
ಬತ್ತಿ ಹೋಗಿದ್ದ ನಾಡಿಯಲ್ಲಿ
ಸುರಿಸಿದೆ ಪ್ರೀತಿಯ ಮಳೆಯ

ನಿನ್ನ ನೋಟದಲಿ ಹುದುಗಿತ್ತು
ಅರಿಯದ ಮೂಕ ವಿಸ್ಮಯ
ಆ ನೋಟದ ಸುಳಿಗೆ ಸಿಲುಕಿ
ನನ್ನ ಮನವಾಯಿತು ತನ್ಮಯ

ನಿನ್ನ ಸಣ್ಣ ಕಿರುನಗೆ ಸೂಚಿಸಿತ್ತು
ಏನೋ ಸಂಭ್ರಮದ ವಿಷಯ
ನಮ್ಮಿಬ್ಬರ ನಡುವೆ ಶುರುವಾಗಿತ್ತು
ಸ್ನೇಹ ಪ್ರೀತಿಯ ಪರಿಣಯ

ಕೊನೆಗೂ ಬಂತು ನಮ್ಮಿಬ್ಬರ 
ಭಾವನೆಗಳು ಸೇರೋ ಸಮಯ
ಪ್ರಕಟಿಸಿದೆ ನಾನು ನಿನಗೆ

ನನ್ನೊಡಲಾಳದ ಪ್ರೀತಿಯ.

ನಿರೀಕ್ಷಕ

ಒಂದಿರುಳ ಕನಸಿನಲಿ ಕಾಣಿಸಿದೆ ನೀ ಬಾಲೆ
ಮೋಹಿತನಾಗಿ ಬರೆದಿರುವೆ ಪ್ರೇಮದ ಓಲೆ

ಬಿಂಬಿಸಿರುವೆ ಮಧುರ ಕ್ಷಣಗಳ ಸರಮಾಲೆ
ನಿನ್ನ ಅಂದ ಬಣ್ಣಿಸಲು ಸಾಲಲಿಲ್ಲ ಅಕ್ಷರಮಾಲೆ

ಕೆಂದುಟಿಯ ಮೇಲೆ ನಲಿದಾಡುತ್ತಿದ್ದ ಕಿರುನಗೆ
ನಾಸಿಕದಲಿ ನೆಲೆಯೂರಿದ್ದ ಆ ಕೆಂಡಸಂಪಿಗೆ
ಕಣ್ಣ ಕುಕ್ಕುವ ನಿನ್ನ ಹೊಳಪಿನ ಮೈಕಾಂತಿಗೆ
ಮರುಳಾಗಿ ಮರೆತೆ  ನನ್ನೆ ನಾ ಅರೆ ಘಳಿಗೆ

ಕುಡಿನೋಟ ಬೀರಿ ನೀ ಮಿಂಚಂತೆ ಸಾಗಲು
ಗುಡುಗಿತು ಬಾನು ಕೂಡ ನಿನ್ನ ತಡೆಯಲು
ಮಳೆಯ ಹನಿಹನಿಯಲ್ಲೂ ನೀನೆ ಕಾಣಿಸಲು
ಕಣ್ಮುಚ್ಚಿ ನಿಂತೆ ನಿನ್ನ ಜೊತೆ ಬೆರೆಯಲು

ತನುವು ಸಾಗಿತು ನಿನ್ನ ನೆರಳ ಹುಡುಕುತ
ಮನವು ಬಿನ್ನವಿಸಿತು ನಿನ್ನ ನಾಮಾಂಕಿತ
ಹೃದಯ ಯಾಚಿಸಿತು ನಿನ್ನ ಪ್ರೀತಿ ಸಹಮತ
ತಿಳಿಸುವೆಯಾ ಚೆಲುವೆ ನಿನ್ನ ಅಭಿಮತ

ಜ್ಞಾನದೀಪ

ದೀಪ ಹಚ್ಚಿರಣ್ಣ ಮನದಲಿ
ಅರಿವಿನ ದೀಪ ಹಚ್ಚಿರಣ್ಣ

ದೀಪ ಎಂದರೆ  ಬರಿಯ ದೀಪವಲ್ಲ
ಜಾತಿ ಭೇದವ ತೊಲಗಿಸೊ ದೀಪ
ದ್ವೇಷ, ಅಸೂಯೆ ದಹಿಸುವ ದೀಪ
ಪ್ರೀತಿ ಪ್ರೇಮವ ಪಸರುವ ದೀಪ

ದೀಪ ಎಂದರೆ  ಬರಿಯ ದೀಪವಲ್ಲ
ಅರಾಜಕತೆಯ ಅಡಗಿಸೋ ದೀಪ
ಭ್ರಷ್ಟಾಚಾರವ ನಿವಾರಿಸೊ ದೀಪ
ಶಿಷ್ಟಾಚಾರವ ಬೆಳಗಿಸೋ ದೀಪ

ದೀಪ ಎಂದರೆ  ಬರಿಯ ದೀಪವಲ್ಲ
ಅನೀತಿ,ಅಜ್ಞಾನವ ಅಳಿಸುವ ದೀಪ
ಮೂಢನಂಬಿಕೆಯ ಕೊಲ್ಲುವ ದೀಪ
ಸತ್ಯವ ನುಡಿವ ಕ್ರಾಂತಿಯ ದೀಪ

ಆತ್ಮಶಾಂತಿ

ಗುರಿಯೆ ಇರದ ದಾರಿಯಲಿ
ಅಲೆಯುತ್ತಿದ್ದೆ ಗುರಿಯ ಹುಡುಕುತ
ತಿರುವೆ ಸಿಗದ ಬಾಳಿನಲಿ
ತಿರುಗುತ್ತಿದ್ದೆ ತಿರುವ ಬಯಸುತ

ಹಾವು ಏಣಿಯ ಆಟವಾಡುತಿತ್ತು
ಅದೃಷ್ಟವು ಬಾಳೆಂಬ ಪಯಣದಿ
ದೇಹವ ಬಿಟ್ಟು ಜೀವ ಧಾವಿಸಿತು  
ನಿರಂತರ ಸೋಲಿನ ಬೇಸರದಿ

ಅಲೆದು ಅಲೆದು ದಣಿದ ಪ್ರಾಣಕೆ
ತುಸು ದೂರದಿ ಕಂಡಿತು ಚಿತಾಜ್ಯೋತಿ
ಆತ್ಮವು ಹರುಷದಿ ಹೇಳಿತು ಮೆಲ್ಲಗೆ
ಸದ್ಯ! ಈ ಬಾಳಿಗೆ ದೊರೆಯಿತಲ್ಲ  ಮುಕ್ತಿ

ಜನನಿ

ಅಮ್ಮ ನಿನ್ನ ಪ್ರೀತಿ ಬಹು ಮಧುರ
ಅದ ಪಡೆದ ನನ್ನ ಜೀವನ ಅಮರ

ನೀ ಕಲಿಸಿಕೊಟ್ಟೆ ನನಗೆ ಮೊದಲ ನುಡಿ
ನೀನೆ ಬರೆದೆ ನನ್ನ ಬದುಕಿನ ಮುನ್ನುಡಿ

ಬೆಳೆಸಿದೆ ನನ್ನ, ನೀಡಿ  ಅಕ್ಕರೆಯ ಕೈತುತ್ತು
ಬೆಂಬಲಿಸಿದೆ ನನ್ನ, ಕೊಟ್ಟು ಪ್ರೀತಿಯ ಮುತ್ತು

ಜೀವನ ಪಯಣದಿ ನಾ ಸಾಗಲು ಮುಂದೆ
ನೀ ನೆರಳಾಗಿ ಇದ್ದೆ ಸದಾ ಬೆನ್ನ ಹಿಂದೆ

ತ್ಯಾಗ, ಮಮಕಾರಕೆ ನೀನೆ ಮೂರ್ತ ರೂಪ
ನನ್ನ ಸಾಧನೆಯ ಹಾದಿಗೆ ನೀನೆ ದಾರಿ ದೀಪ

ನನ್ನ ಏಳಿಗೆಗಾಗಿ ನಿನ್ನ ಜೀವ ತೇದಿದ್ದೆ
ಗುಟುಕು ಸುಖದಲ್ಲೆ ನೀ ತೃಪ್ತಿ ಪಡುತ್ತಿದ್ದೆ

ಅಮ್ಮ ನೀನೊಂದು ವಾತ್ಸಲ್ಯದ ಸಾಗರ
ಎಷ್ಟು ಮಾಡಿದರು ಸಾಲದು ನಮಸ್ಕಾರ

ಶುಭದಿನ

ನಸುಕಿನಲಿ ಇಬ್ಬನಿಯ ಕರಗಿಸಿ
ಹಕ್ಕಿಗಳ ಕಲರವ ಮೊಳಗಿಸಿ
ಹೊಸ ಕನಸುಗಳ ಗರಿಗೆದರಿಸಿ
ಅರುಣ ಬರುವನು ಉದಯಿಸಿ

ಕಂಡ ಕನಸುಗಳ ನನಸಾಗಿಸೋ ಛಲ
ನಿನ್ನೆಗಳು ಕೊಟ್ಟ ನೋವನು ಮರೆವ ಬಲ
ಸಾಧನೆಯ ಹಾದಿಯಲಿ ಏರುವ ಹಂಬಲ
ಸಿಗಲಿ ದಿನನಿತ್ಯ ಪ್ರೋತ್ಸಾಹದ ಬೆಂಬಲ

ಹೊಸ ಗುರಿಯ ಕಡೆಗೆ ಸಾಗಲಿ ಪಯಣ
ಸಫಲತೆ ಪಡೆಯಲು ತೊಡು ನೀ ಪಣ
ಸೋಲಲ್ಲೂ ಗೆಲುವ ಪಡೆವುದೆ ಜೀವನ
ಹೊರಡು ನೀ,ಶುಭವಾಗಲಿ ನಿನಗೀದಿನ..!

ಕೀರ್ತಿ

ಕೊಡಚಾದ್ರಿ ನೀನೆಷ್ಟು ರಮಣೀಯ
ನೀ ನಿಸರ್ಗದ ಅದ್ಭುತ ವಿಸ್ಮಯ

ಗಿರಿರಾಜ ಆಯೋಜಿಸಿದ ಸ್ವಯಂವರ
ತುಂಬಿ ತುಳುಕುತಿತ್ತು ಅಂತ್ಹಪುರ
ಎಲ್ಲರ ಮನದಲು ಒಂದೆ ಕಾತುರ
ಯಾರಾ ನಿನ್ನ ಪಡೆವ ಸರದಾರ

ವರುಣನ ಮಳೆಯ ನರ್ತನ
ಅರುಣನ ಹೊಳೆಯುವ ಕಿರಣ
ಚಂದ್ರನ ನಗುವಿನ ಹೂರಣ
ಸೆಳೆಯಲಿಲ್ಲ ನಿನ್ನ  ಗಮನ 

ಕಾಮನ ಬಿಲ್ಲಿನ ಚಮತ್ಕಾರ
ಮೇಘಧೂತನ ಬೆಳ್ಳಿ ಗೋಪುರ
ಗಾಳಿಯ ಸಂಗೀತದ ಹಂದರ
ಮೂಡಿಸಿದವು ನಿನ್ನಲಿ ಬೇಸರ

ಬಂತು ಅನಿಸಿಕೆ ತಿಳಿಸುವ ಸರದಿ
ಕುತೂಹಲದಿ ಕೇಳುತಿರಲು ಮಂದಿ
ನೀ ನುಡಿದೆ ನಾಚುತ ಮನದಿ
ಆಗಬೇಕೆಂದು ವನರಾಜನ ಮಡದಿ

ನೀ ಹೇಳಿದ್ದೊಂದೆ, ಆತನ ಹಸಿರ ಸಿರಿ
ಹೆಚ್ಚಿಸುರುವುದು ನಿನ್ನ ಕೀರ್ತಿಯ ಗರಿ

ಚುನಾವಣೆ

ಬಂತು ಬಂತು ಚುನಾವಣೆ
ಎಲ್ಲೆಲ್ಲೂ ದುಡ್ಡಿನ ಚಲಾವಣೆ

ಮದ್ಯದ ಸಾಗರ ಹರಿಸಿ
ಹಣದ ಹಡಗಿನಲ್ಲಿ ಕೂರಿಸಿ
ಮತ್ತಿನ ಅಲೆಯಲಿ ತೇಲಿಸಿ
ಕೇಳುವರು ಮತ ಯಾಚಿಸಿ

ನಿತ್ಯ ವಸ್ತುಗಳ ಬೆಲೆ ತುಟ್ಟಿ
ಕೋಟಿಗೆ ಸಿಗದಾಯ್ತು ರೊಟ್ಟಿ

ಕೊಡುವರು ಭರವಸೆಗಳ ಪಟ್ಟಿ
ಮಾಡಲು ತಮ್ಮ ಕುರ್ಚಿ ಗಟ್ಟಿ

ಜನರೆಲ್ಲಾ ಕೂಡಿ ಚರ್ಚಿಸಿ
ನೇತಾರರ ಹಿನ್ನೆಲೆ ಸಂಗ್ರಹಿಸಿ
ನಾಯಕ ಯಾರೆಂದು ನಿರ್ಧರಿಸಿ
ನಂತರ ಹೋಗಿ ಮತ ಚಲಾಯಿಸಿ

ಇನ್ನಾದರೂ  ಆಗಲಿ ಬದಲಾವಣೆ
ನಿಷ್ಟಾವಂತರಿಗೆ ಸಿಗಲಿ ಮನ್ನಣೆ 

ಪ್ರಕೃತಿ

ಭೂಮಿಯಲೆಲ್ಲ ನರ್ತಿಸುತ್ತಿತ್ತು ಬರಗಾಲದ ಕರಿ ನೆರಳೇ
ರಮಿಸಲೆಂದು ರಭಸದಿ ಬಂತು ಧಾರಾಕಾರವಾಗಿ ಮಳೆ
ನಾಚಿ ಮೌನದಿ ಸಮ್ಮತಿಸಿತು ನವ ವಧುವಿನಂತೆ ಇಳೆ
ನವಮಾಸಗಳಾಗಿರಲು ಎಲ್ಲೆಲ್ಲೂ ಹಚ್ಚ ಹಸಿರ ಹೊಂಬಾಳೆ
ಎಲ್ಲರಲ್ಲೂ ಬರಗಾಲ ಮುಗಿಯಿತೆಂಬ ಸಂತೋಷದ ಕಳೆ
ತಿಳಿದುಕೊ ಮಾನವ ನಿನ್ನನ್ನುಳಿಸಿರುವುದು ಮರ-ಗಿಡಗಳೇ                                                                  
                                                                 

ನಿದ್ದೆ

ನಿದ್ದೆ ನೀ ಎಲ್ಲಿದ್ದೆ
ನಿನ್ನ ಹುಡುಕುತಲ್ಲಿದ್ದೆ
ನೀ ಮುಂದೆ ಓಡುತ್ತಿದ್ದೆ
ನಾ ಹಿಂಬಾಲಿಸುತ್ತಿದ್ದೆ
ಜಾರಿ ನಾ ಕೆಳಗೆ ಬಿದ್ದೆ
ಕಣ್ಣ ಬಿಟ್ಟು ಮೇಲೆದ್ದೆ
ಅರಿತೆ, ನಾ ನಿನ್ನಲ್ಲೆ ಇದ್ದೆ